日日洗頭好傷頭髮？

其實我地應該幾耐洗一次頭呢？日日洗頭會令頭髮好傷？網絡上都有好多文章，尤其外國文章特別多，如果你只需要GOOGLE下“HOW OFTEN SHOULD I WASH MY HAIR”，都有好幾十篇文章會講到，當然YY都睇左唔少呢類文章。概括黎講，視乎油脂、汗水分秘情況同髮質，都無一個標準答案。YY主張以香港環境同氣候，其實日日洗頭會比較好啲，除左剛剛染髮特殊顏色之外。只要洗髮程序正確，加上用合適的洗護產品，每一次洗髮其實都係一種護髮的方法。

正確洗護程序

我發現好多客人每日都只係沖洗一次就算，尤其好多年青男士，又鍾意用各式各樣造型產品，好早開始有疑似脫髮問題。正確洗髮係應該用洗髮水洗兩次頭髮，第一次係沖走塵埃同多餘油脂，第二次先係真正清潔毛囊同頭髮。

洗護步驟：

1. 梳頭：用按摩梳擦一下頭髮
2. 洗髮：用溫水沖濕頭髮，不要過熱；將洗髮水倒於掌心，大概一個五元硬幣的份量，先於掌心打圈微微起泡才塗抹於頭皮及頭髮上，以手指肉輕輕按摩，兩至三分鐘後沖淨再重覆。
3. 護髮素及髮膜：沖淨頭髮後輕輕擠出多餘水份，將護髮素或髮膜(建議一星期可用一至兩次頭膜代替護髮素)均勻地塗抹於髮尾位置，不要接觸頭皮。待數分鐘後才沖掉效果更好。
4. 免沖修護用品：印乾頭髮後，塗適量的免沖護髮素及髮尾油 (有關髮美油請按此)
5. 吹乾及梳理：切記濕頭髮時不要用梳，尤其密齒梳梳髮，頭髮在濕的狀態時比較容易脆弱及容易折斷，最好用手指輕輕抓開頭髮便可。頭髮一定要印乾一點才開始吹髮，一來頭髮快乾啲，二來可以避免熱力長時間傷害頭髮

網絡相片來自：https://sk.fehrplay.com/krasota/66504-alerana-otzyvy-ob-effektivnosti-sredstva-protiv-vypadeniya-volos.html

成日頭痕、頭皮好繃緊 可能你有頭皮敏感 (下)

上一篇提及過暫時性頭皮敏感成因同舒緩方法＜成日頭痕、頭皮好繃緊 可能你有頭皮敏感 (上)＞，今次就講長期性嘅頭皮敏感成因同埋舒緩方法。

頭皮敏感癥狀：感覺頭皮繃緊、痕癢(洗完頭都好痕)、甚至更嚴重會覺得頭皮赤痛同有濕疹，有時候仲會有頭皮屑出現，因為頭皮不停自我更新所致。好多人見自己有頭皮屑就用去屑洗護產品，咁樣反而會情況更差。長期性敏感就即使無染髮無電髮都有上述癥狀，換洗髮水都解決唔到，好多時候都係飲食不均、壓力或者外在污染引致。

飲食唔健康同壓力會令油脂分秘失均，頭皮免疫力就會失調，就好容易因為其他外在因素而令到頭皮敏感。

頭皮敏感原因

1. 長期使用劣質或唔適合嘅洗髮水(發生男士身上多，留意之後會有文章講男士頭皮問題)
2. 經常使用造型產品後又唔勤力清潔好頭皮
3. 長期戴帽或頭盔又唔注意衛生
4. 長期暴曬⋯⋯等等

以上種種原因，都好容易令頭皮容易敏感，除左用要轉抗敏洗頭水之外，都要改變一下壞習慣。

改善頭皮敏感的方法

1. 洗護方面，唔好屋企人用咩我就用咩，因為個個人頭皮同髮質唔同，應該用真正合適自己嘅洗髮水
2. 用造型產品本身問題不大，係用完之後應該當天即時洗乾淨。如果日日使用造型產品就最好用一啲水溶高嘅產品或者低酒精成份嘅比較好，當然最好定期深層清潔頭皮
3. 長期戴帽或要經常戴頭盔嘅人士，如果可以就每日清潔一下帽同頭盔，如果唔方便清潔就準備定多幾個頭套，每日都換一個就最理想
4. 長期暴曬就最好戴帽保護頭皮

頭套－求其上網搵張相(photosource:https://www.facebook.com/jpmotobike/posts/1693928607503424)

最後一句，牙齒係一世，我地都唔想未到70歲就要配假牙，所以都會定期去洗下牙，對嗎？毛囊一樣，死左就好難救番，你都唔想40歲就要日日戴假髮，對嗎？好好保護及護理一下頭皮啦！

以上內容係憑YY從書本及經驗歸納出之建議及分析，如果問題沒有改善，請向你嘅皮膚科醫生查詢。

成日頭痕、頭皮好繃緊 可能你有頭皮敏感 (上)

頭皮其實係皮膚一部份，但係因為有頭髮遮蓋住，所以我地都好少會察覺頭皮敏感問題。YY遇過好多客人，都唔知道自己係有敏感嘅情況，所以遲遲都無處理。

頭皮敏感癥狀：感覺頭皮繃緊、痕癢(洗完頭都好痕)、甚至更嚴重會覺得頭皮赤痛同有濕疹，有時候仲會有頭皮屑出現，因為頭皮不停自我保護更新所致。好多人見自己有頭皮屑就用去屑洗護產品，咁樣反而會情況更差，因為一般去頭屑洗髮水唔係針對敏感問題，可能令頭皮更加乾旱。

頭皮敏感都有分暫時性或者係長期，如果只係染髮電髮後出現繃緊同不適情況，咁就屬於化學性敏感短暫性，多數出現於經常電髮同染髮嘅客人身上。而長期性敏感就即使無染無電都有上述癥狀，換極洗髮水都解決唔到。

YY遇過兩個最深刻嘅CASE，兩個都係廿歲頭嘅女仔，一個因為經常染髮，染到好淺色，甩左好多頭髮都唔願處理；呢個CASE，YY幫佢唔到，因為佢唔俾我幫 XDXD 

另一個慘啲，因為讀書壓力而引致頭皮都有濕疹，濕疹位置啲頭髮都甩晒，用好多醫生開嘅藥都醫唔好。後者就有聽YY建意，改用抗敏系列洗髮水同抗敏舒緩液，已經好番好多。

化學性敏感預防方法

Source: https://www.newbeauty.com/blog/dailybeauty/5998-a-surprising-way-to-stop-scalp-irritation-caused-by-hair-dye/

1.電髮染髮前不要洗髮 

準備電髮染髮前最好24小時前不要洗髮，當然最好唔好用造型產品。唔洗髮可以確保頭皮有足夠頭油保護頭皮，而唔用造型產品，係為方便髮型師梳開頭髮同唔會影響電染效果。

2.染髮前用頭皮保護油/霜

一般專業髮型屋都會用染髮前用的頭皮保護油/霜，可以問下髮型師，如果要漂到好淺色，多數都會用到。

3.採用不含亞摩尼亞(AMMONIA FREE)染髮劑

經常要蓋白髮客人，可考慮選擇不含亞摩尼亞(AMMONIA FREE)嘅染髮劑。好多人都以為AMMONIA FREE即係唔傷頭髮，其實正確黎講AMMONIA FREE係唔傷頭皮。因為AMMONIA呢種成份係較常令人敏感，唔代表唔係好野。

染髮電髮後，令頭皮無咁繃緊嘅小建議：

1. 隔多24小時先洗頭，除左令染髮後顏色或電髮後嘅卷度穩定，都可以俾頭皮休息一下
2. 使用低鹼度洗護系列，如染後專用嘅洗髮水，可以修復頭髮之餘亦可減低對頭皮嘅刺激3. 如頭皮出現紅腫，就用可以舒緩敏感嘅洗護產品4. 染髮後到下次再染髮前都可做下舒緩抗敏感嘅頭皮護理

下一篇再講下長期頭皮敏感嘅成因同治療方法啦～

以上內容係憑YY從書本及經驗歸納之建議及分析，如果問題沒有改善，請向你嘅皮膚科醫生查詢。

洗完頭半日已經又油又臭? 頭皮給你的甩頭髮警號 你發現沒有？

https://www.belgraviacentre.com/blog/smelly-head-and-hair-loss/

排除基因遺傳的因素，一般都市人都會有脫髮的問題，並覺得隨年紀增長，甩頭髮是屬正常! 如果你有呢個想法，咁我勸你唔洗再睇落去喇⋯⋯

有無得覺頭髮唔知幾時開始少左好多？又好似愈來愈幼弱？

其實頭皮已經好早發出警號，而係你無察覺到。你只係等頭髮變得愈來愈愈幼弱、疏落先開始用造型產品改善其外觀，其實並唔係最佳做法，分分鐘因為用得過多嘅造型產品而令毛囊堵塞的情況加劇。

頭油是什麼？

頭油是從皮脂腺製造出來，從毛孔排出，頭油的作用是保護頭皮及頭髮的，亦可平均皮膚的pH值，避免皮膚細胞因乾旱而壞掉。但當皮脂腺製造的油脂多過所需，便會阻礙毛髮生長。

為何會頭油過盛？

都市人不健康的飲食及生活習慣，長期睡眠不足、沒有攝取足夠的水份、喜歡煎炸食或及辛辣食物都容易引致頭油過多。加上洗髮方法不正確，令頭油問題愈來愈嚴重。(正確洗髮程序，稍後再寫)

油性/脂漏性脫髮的4大警號－臭、黃、痕、敏感，你接收到嗎？

都市人的油性/脂漏性脫髮，多數是由頭油過多而開始的。

頭油過多 ➡ 洗唔乾淨 ➡ 頭皮開始臭有異味 ➡ 經頭皮檢查儀，發現毛囊周圍都有黃黃橙橙的積物 ➡ 一直下去沒有做深層清潔 ➡ 頭皮開始常常痕癢，經常抓頭皮 ➡ 頭皮發炎及敏感 ➡ 毛囊被角化的頭油堵塞 ➡ 毛髮不能健康生長 ➡ 頭髮脫落後因為毛囊被堵塞而不再長出

所以，當你或發現身邊有朋友個頭好臭，洗左頭唔夠半日大都出好多油，就要開始注意下，盡早開始處理喇。盡早開始處理喇，愈早開始處理頭油過盛問題，就可以大大減少脫髮現象！

遵守3個健康生活方式 人健康啲 頭髮都靚啲

相信會睇我呢個BLOG嘅人都係為左同一個目的，就係想擁有健康嘅頭髮，健康及豐盈嘅頭髮往往令人睇落後生啲，唔知你認唔認同呢？

上回提及過，不良飲食同生活習慣都會從頭髮反映出來，如果只係單靠護髮產品而唔狠狠改變自己飲食習慣，頭髮係唔會變得更好。只要遵從以下三個簡單生活方式，包你健康好左頭髮都靚啲：(相信人人都聽過，只係無認真遵守過)

1.多食新鮮生果同蔬菜

source:http://www.quotidianodiragusa.it/2017/05/31/salute-e-benessere/prude-gola-frutta-verdura-sindrome-orale-allergica/30810

每日只要食五份唔同顏色的生果同蔬菜，就可以攝取足夠維他命同微量原素，維持一日所需，仲可以抗衰老添。

一份即係幾多？一份就係你一個拳頭咁多左右，其實五份唔算好多啦。

香港人餐餐都出街食，係好似好難，簡單啲早餐食多一隻香蕉、咬多個蘋果，返到公司午飯前食碗提子或士多啤梨，出去食飯叫多個油菜走油，下午茶食個沙律代替油占多。咁就夠啦。

2. 多飲水

茶、咖啡同啤酒都唔計，因為呢啲都會令細胞水份流失。只有水先可以真正補充細胞水份同令頭髮更有生命力，尤其當年紀增長，水份流失得更快，頭髮就會愈來愈乾旱。每日大約飲到兩公升水，減少飲甜野同酒精飲品，慢慢你就感受到飲水帶黎嘅好處。

3. 食真正的食物，並唔係食品

食品－加工而成，少食多滋味

Source：https://www.jiankang.com/detail/204395.shtml

食品係指經過加工而成的，鹽分高不特止，營養價值更加低，甚至毫無營養可言。食物係未經化學處理，先有營養可取。我們要攝取足夠的營養，先有更好的髮質呢。

Reference: 

"Shiny Happy Hair”, ANDREW BARTON, New Holland

Hair Delight YY Blog

頭髮出賣了「你」身體的秘密

頭髮出賣了「你」身體的秘密

之前寫過關於頭髮和頭皮嘅結構及構造，亦介紹了不同的護髮及造型產品。不過有一件事關於頭髮YY從未提過，就係「頭髮究竟有無生命呢？」

如果你讀過生物學(Biologoy)，你應該知道其實頭髮係無生命的！無錯！頭髮從頭皮中毛囊長出，是身體的代謝物，科學上頭髮是沒有生命的物質。所以由今日起，你唔需要再花時間、花心機同花錢護髮喇！嘿嘿！頭髮可以好影響一個人的外觀，唔同髮色、長短同造型都標誌著一個人的性格及風格。

頭髮雖然無生命，但長於唔同人身上都有唔同特性同性格，頭髮道出好多故事，亦說出了一個人是否擁有良好的生活習慣。如果沒有見一個客人一段時間，而頭髮幾乎沒有長過，大概可以估到她要不是找了別的髮型師，就是身體差了。

頭髮尤其髮根的位置若毫無光澤及彈性，就知道他一定沒有吸收足夠的營養。如一個人的頭油過盛、頭皮發紅、乾早、甚至脫髮，就是身體對我們發出了重要的警號。因為當身體受到入侵襲或壓力時，又不能攝取更多的營養維護內在所需，身體就會自然先抽起本來供及頭髮及皮膚的營養用作防禦。

YY平常除了靠經驗亦會了解客人日常飲食及生活習慣，才可以分析到客人真正的需要。頭髮的多少、粗幼及特性雖然決於DNA，但髮質健康與否都取決於你的飲食及生活習慣。無論你如何改變飲食習慣都不能改善已經長出的頭髮，對已長出的頭髮都必需使用不同的護髮產品去修復髮質。

雖然頭髮是代謝物，但頭髮是由有生命的毛囊長出來。身體各部位吸收足夠營養後剩餘的營養就會供給毛囊，毛囊吸收血液中的營養再製造頭髮。中醫角度，頭髮是「血餘」，是身體各部位吸收足夠營養後代謝出來的代謝物，所以你的飲食及生活習慣都能從頭髮反映出來。如你有沒有吃蔬果的習慣、有沒有多飲水及運動，只要看看你的頭髮就略知一二。

除了採用合適的護髮產品，改變頭髮髮質的根源問題就是要有均衡飲食、足夠休息及運動，這樣頭髮才會更健康。下一篇文章會介紹有助頭髮生長的主要營養素。

Reference: 

"Shiny Happy Hair”, ANDREW BARTON, New Holland
Photo Source:
https://beautyeditor.ca/

http://hairdelight.com/blogs/yy-hair-care/your-hair-tell

髮美油最補濕？定最保濕？

YY記得自己開始懂得分開「補濕」同「保濕」嘅概念，係由接觸護膚品開始，因為做產品翻譯時上司好執著我用「補」同「保」。記得未畢業時做髮型產品嘅翻譯，我都唔係好識分Moisturizing 同 hydrating，當時INTERNET未好普及加上YY唔會護膚，所以都無咩去考究。

有關髮美油呢樣產品嘅作用之前都有提過 (「其實你日日都傷害緊自己把頭髮!!!」)，但到今日特別開呢個TOPIC就係因為最近YY問十個客人，十個客人都同YY講同一番說話：「係呀，我都知道自己D頭髮好乾，所以日日都用髮美油架！」

每日用髮美油的確係一個非常好嘅習慣，但係如果淨係長期只用髮美油，你就會發現啲頭髮越用越乾，你仲會怪支髮美油又貴又唔好用！

原因係髮美油係「保濕」嘅產品，而唔係「補濕」，定義上「補濕」hydrating 係指注入水份、添加水份嘅意思；而 「保濕」moisturising 係指保護水份、減少水份流失嘅意思。換言之，髮美油係可以幫助減少水份流失，但係如果你啲頭髮未身好乾，髮尾油根本發揮唔到最大的保濕功效。

使用髮美油正確嘅方法應該係先塗補濕嘅髮型產品，例如免沖補濕護髮素或噴霧，再塗髮美油咁就最好啦！

https://hairdelighthk.com/blogs/yy-hair-care/thetruthabouthairserum

頭皮護理 深入一點 - 防止脫髮

上回「天呀～我開始甩頭髮～頭皮護理的重要性 」有提過，每人的頭皮上都有超過十萬個毛囊，每個健康的毛囊都應該可以長出兩至三條頭髮。

但係毛囊都需要休息架，每一個毛囊都有自己嘅生長週期，所以有時候我地發現自己一次過甩左好多頭髮，4-6個月後又突然多左好多好短嘅頭髮長出，咁就唔需要太過擔心。當然，呢個期間都要保持毛囊清潔，同堆保持良好嘅飲食睡眠習慣就更加好。

毛髮其實可以無休止的生長

年紀大左，唔代表一定有脫髮問題，當然排除遺傳性或長期服食藥物影響， 只要毛囊機能健康，毛髮其實可以無休止的生長。

毛髮週期

毛髮分為成長期、退化期、休止期，15至30歲時毛髮生長速度最快， 50歲以後開始緩慢，跟人體的新陳代謝及日積月累個人習慣有關。

成長期－女性3-7年，男性2-4年，當長度達25-30cm左右就會慢落黎

退化期 － 頭髮開始老化，同毛囊分開

休止期 － 大概4－6個月，毛髮再重新長出，但如果毛囊被油脂堵塞新毛髮就有機會長唔到出黎或者越來越幼

飲食方便要多注意，少飲酒同咖啡因，多飲水同吸收多啲微量原素(鈣、鎂、鋅)、蛋白質都可以令頭髮強韌啲，每日可以食到8-10果仁就最理想。中醫角度，頭髮為「血餘」，係我地身體最後得到營養嘅部分，所以要食多啲有營養嘅食物，頭髮先有足夠營養。另外，鐵質吸收都好重要，因為蛋白質同鐵。。。。。好似好複雜

總之，要防止脫髮問題，要保持頭皮及毛囊清潔，定期護理下，選擇有營養食物同多休息啦!

https://hairdelighthk.com/blogs/news/scalptr_antihairloss

絲蛋白修護，愈做愈乾？！

如果YY話你知，絲蛋白修護做得多，會令頭髮好乾，但係唔修復角蛋白，頭髮又無力又補充唔到水份，又係咩玩法呢? 

是咁的，好多人以為做絲蛋白修護係可以幫頭髮補濕，實情係絲蛋白修護係可以幫頭髮「保」濕，但非「補」濕。YY對「保濕」同「補濕」係有唔同定義，「補」應該係補充水份嘅意思，而「保」係保護水份減少水份流失，亦係鎖住水份嘅意思。有機會再講！

角蛋白質同水份關係

角蛋白質同水份同樣重要，原因好簡單，想像一下頭髮好似一支好嘅幼吸管咁，將乾嘅沙(角蛋白質)倒入條飲管度，好快地沙就會流番出黎；但如果將沙倒入去再倒D水(注入水份)，因為有水嘅張力，沙(角蛋白質)就可以停留等耐一點；同樣地，如果吸管都充滿沙(角蛋白質)，亦都可以將水份留住得耐D。

換句話，角蛋白質同水份係相輔相成，對頭髮黎講同樣重要，因為要有足夠水份先可以抓著角蛋白質，亦要有足夠角蛋白質先可以將水份留住耐一D。

所以每次做絲蛋白順直修護前後，都要用補濕能力較高嘅護髮產品，甚至做絲蛋白順直前一個星期先集中保濕，咁效果就會更持久。

下次講下補濕問題先~

https://hairdelighthk.com/blogs/yy-hair-care/keratinetreatmentdehydratingyourhair

天呀～我開始甩頭髮～頭皮護理的重要性

頭皮係頭髮根源，無論你你男士定女士都要好好重視，唔好甩晒頭髮果時兒問點解，無得救時先開始著緊。。。「脫髮不是一天形成的問題，當中是經過一個過程，是日積月累的！」

坊間有好多護髮中心都會有頭皮護理(SCALP TREATMENT)的服務，不過大眾似乎對呢類護理概念有所保留。多數人覺得：「我好多頭髮都未甩」、或者覺得「做頭皮TREATMENT仲貴過染髮電髮，好似唔抵囉」。YY明白的，因為頭皮護理的效果唔係即時，亦唔係眼見唔到。

頭皮及頭髮的關係

頭皮是皮膚一部份，有超過十萬嘅毛囊、毛囊入面有好多微細血液同淋巴腺，提供營養培育住兩至四條髮根，正常健康毛囊都可以長出兩至三條頭髮架，毛囊正常情況下都會分秘適量油份保護頭髮。

簡單地講，毛囊好似頭髮嘅床，毛囊要保持乾淨、無堵塞物，頭髮先會乖乖唔會異常脫落。曾經聽過一位台灣老師(台灣髮型屋好早期已經有護理頭皮嘅概念) 講過：「脫髮不是一天形成的問題，當中是經過一個過程，是日積月累的！」

頭皮護理即係?
頭皮護理透過深層清潔毛囊，加入按摩手法，促進血液循環，再配合不同頭皮治療產品，針對唔同嘅頭皮問題。

Photos source from: https://www.prevention.com/beauty/9-causes-of-hair-loss-and-thinning-hair

後記：今次應該簡單易明D吧～

https://hairdelighthk.com/blogs/yy-hair-care/igothairlossproblem

認識頭髮結構－簡易篇

好耐之前已經有寫過一篇BLOG係關於「認識頭髮結構」，有朋友俾我嘅意見係：「太複雜喇！」，可能YY多數教學嘅對像都係髮型從業員，所以。。哈哈。趁聖誕假，終於有時間坐低寫BLOG，就重新寫多次「頭髮結構」呢個題目啦！

頭髮結構

一條頭髮一般有兩至三層，幼頭髮通常得兩層，粗頭髮先會有三層，多數髮型產品都針對唔同層面，簡單地分: 表層-鱗狀表層Cuticle、內層－皮質層 Cortex。

表層-鱗狀表層Cuticle
如其名，透明的、好似魚鱗一層接一層排列得好整齊
作用：鎖住水份同留住角蛋白質，但超級脆弱！當打開就好難修復，水份同角蛋白質就會流失，同埋頭髮就會睇落好無光澤。一般家用護理產品都係修復呢層，因為有即時效果。

內層－皮質層 Cortex
由角蛋白細胞組成，佔頭髮80-90%，決定左頭髮嘅彈性同韌度。需要深層修護加上用適合的家用產品先可以真正修補，例如絲蛋白順直係最多SALON會做到。

資料來源：

1. HAIR CARE REHAB The Ultimate Hair Repair and Reconditioning Manual, Audrey Davis-Sivasothy, Saja Publishing Company,LLC,  2013
2. Hair Structure and Chemistry Simplified, 5^th Edition, John Halal, Milady

其實你日日都傷害緊自己把頭髮!!!

最近YY跟多客人聊天都發現，大部份人都日積月累地傷害了自己的頭髮而不自知，唔知你有無呢? 以下3點係最普遍：

1.      濕頭髮時用梳梳頭

通常洗髮後都習慣直接用梳，甚至密齒梳夾硬梳通打結的頭髮。其實頭髮在濕的狀態是非常脆弱的，尤其洗髮後，頭髮的鱗狀表層都打開了，外界任何的磨擦都會令頭髮受損。

正確做法：洗髮後用毛巾輕輕印乾頭髮，而不是用力擦乾，再塗上免沖的護髮素(Leave-in Conditioner)或精華素或濕髮用的髮尾油。用手指輕輕梳開打結的部份，再用風筒吹乾。最好用暖風，不要用熱風。

2.      出外前不塗任何保護頭髮的產品

女仕出門前總會塗一大堆保濕、精華素、防曬乳等護膚品於面上，但往往忽視了頭髮的需要。紫外線令鱗狀表層變弱，令頭髮中水份同角蛋白質流失得更快。

正確做法：盡量避免濕頭髮出外，出外前塗點精華素或髮尾油，一來可以抗紫外線，二來可以保護頭髮免因與衣物直接磨擦而受損。至於用那一種精華素或髮尾油就視乎需要。染後，電髮後或做過絲蛋白順直護理後都要配合不同產品使用。

3.      只用單一護髮產品

曾有客人反映每日用髮尾油，但頭髮依然越來越乾，所以覺得髮尾油沒有用。其實髮尾油本身是有一定的保濕功效，但重點都是修復鱗狀表層及鎖濕。簡單地說，女仕日常塗護膚品，最基本是：爽膚水à精華素à乳霜，而髮尾油就是「乳霜」用作將「精華素」的營養封鎖。如每天只用髮尾油，但不用滲透性較高的保濕護髮產品，效果當然不夠好。

正確做法：使用髮尾油前，先塗保濕成份較高的產品，如免沖護髮素或保濕噴霧。

染髮後要注意的5大事項

《序》

好多染髮後的顧客都唔明白點解髮型師成日都話染髮後一定要用鎖色洗髮水同護髮素，好多人都應為鎖色洗髮水都係鎖色啫～～甩色咪再染過囉，無所謂啦～～～

其實髮型師成日都強調染髮後要用鎖色護色既洗髮水同護髮素係有原因架，尤其漂完做過特別色既頭髮，因為髮型師花左咁多時間幫你設計的個髮色，唔夠一兩個星期就無晒色，其實都好無奈呢～～～

染髮後要注意的5大事項

1. 染完髮後24-48小時內唔好洗髮

染髮後最好就隔多一日先再次洗髮，因為染髮後頭髮同頭皮都會比較乾同敏感，加上顏色粒子仲未穩定，所以最理想就係可以隔多晚先洗會比較好。

2. 染後兩至三星期一定要用鎖色洗髮水！！

鎖色洗髮水其實唔係淨係鎖色咁簡單，其實鎖色洗髮水最大的作用係修復染後既頭髮，尤其染後兩至三星期是修復頭髮的關鍵時刻！

一般染髮劑都係偏鹼性的，因為要打開頭髮的鱗狀表層令染髮劑可以滲入髮芯從而改變顏色，所以染髮後鱗狀表層會打開左令水份同角蛋白質容易流失(有關鱗狀表層既詳細解釋，可以睇返上一篇文章：認識頭髮結構。）

而鎖色洗髮水及護髮素係偏酸性，一來可以鎖緊鱗狀表層，減少水水份同角蛋白質流失；二來可以平衝頭髮既酸鹼值，令顏色粒子穩定下來；從而達到鎖色效果。

3. 染完頭髮一定要做下保濕TREATMENT

    染完頭髮一定要定期做下保濕TREATMENT，染後頭髮係需要保持一定的濕度先可以令髮色更持久。一個星期抽兩次，用HAIR MASK當護髮素都會好好多，當然都要配合鎖濕護髮產品一齊用啦！

4.  盡量用溫水洗髮

     熱水會令鱗狀表層打開，令顏色流失得更快，所以請盡量用溫水洗髮。

5.  染完避免游水或曬太陽

     如果真係要去游泳池游水或者去曬日光浴的話，就一定要做好保護，最好事前先塗一些保濕的護髮產品同髮尾油，如果係去泳池游水就最好戴返泳帽，盡量減低甩色機會。

其實仲有好多野要注意的，不過YY認為繁忙既都市人如果可以做到以上幾點就已經好好架喇～～

參考資料：

1. After-Care for Colored or Chemically-Treated Hair

    http://www.hairfinder.com/info/after-care.htm

2. 26 tips to help protect color-treated Hair & keep it looking fabulous

    http://www.matrix.com/blog/26-tips-to-help-protect-color-treated-hair-and-keep-it-looking-fabulous

3. Avoid the fade! 5 proven tips to protect color treated hair

    http://www.discovergoodnutrition.com/2014/07/tips-for-color-treated-hair/

4. Hair Coloring, Hair Structure and Chemistry Simplified, 5^th Edition, John Halal, Milady

認識頭髮結構

《序》

學會護髮第一步：認識頭髮結構

開呢個TOPIC之前，YY其實左思右想左好耐，因為在網絡上唔難搵到有關[頭髮結構]資料，而且要從學術角度講，真係好悶同有排寫。但若真係要深入了解美髮同護髮，就不得不先了解頭髮同頭皮既結構同埋點樣分辨自己既髮質及類別。YY將會歸納所有找到既資料，令大家更容易。

認識頭髮結構

頭髮一般有兩至三層,相信大家都不會覺得陌生：鱗狀表層(Cuticle)、皮質層(Cortex)同髓質層(Medulla), 注意不是人人都有髓質層的，要視乎頭髮粗幼而定。髓質層一般只有粗既頭髮先有髓質層,幼弱至中性晚頭髮係無既，入面其實係咩都無，亦無特別作用，所以YY都唔會特別多講。

圖片：頭髮結構

圖片來源：http://www.peoples.bm/blog/anatomy-hair/

鱗狀表層

鱗狀表層係頭髮最外既第一層，亦係最重要既一層！！因為呢層係一條頭髮第一個防線，鱗狀表層完唔完整就決定你D頭髮健唔健康,同堆睇落去有無光澤喇～

左圖：健康頭髮鱗狀表層，右圖：受損頭髮鱗狀表層
圖片來源：http://www.peoples.bm/blog/anatomy-hair/

鱗狀表層本身係透明既，顯微鏡下睇，健康既鱗狀表層係似魚鱗咁，一層接一層，排列得好整齊，要咁樣先可以真正鎖住水份同留住角蛋白質。鬆開左既鱗狀表層就會令水份同角蛋白質更加快流失。鱗狀表層因為受到破壞而排列得唔整齊就會令頭髮睇落暗啞無光。因為唔整齊既鱗狀表層會令光線不規則折射，所以視覺上會睇到D頭髮會毫無光澤。

要知道，同一條頭髮上近髮根既鱗片比髮尾既鱗片一定排列得整齊好多，因為髮尾既髮齡一定大過髮根既髮齡，所以一般針對修補鱗狀表層既護髮產品都係主要塗髮尾。(有關唔同類型產品既用法就留待以後既文章再分享)

皮質層

如果你打橫剪開你條頭髮，再用顯微鏡睇，你就會發現皮質層係佔左一條頭髮結構80-90%，呢一層除左睇到頭髮既色素同髮質之外，亦決定左頭髮既韌度同彈性。皮質層其實係由緊密既角蛋白細胞組成，頭髮之所以有彈性就係因為獨特既蛋白質結構，染髮或電髮都係透過改變入面既色素或蛋白組織既形態。

換言之，角蛋白質就係頭髮最主要既原素，所以，嗯。。。至於咩係角蛋白質，YY決定分另一篇文章講啦，哈哈。今次講住咁多先，至於有關髮質同點分類，仲有頭皮結構都留待下次再講啦。

參考資料：

1. Hair & Scalps: Just the Basics, HAIR CARE REHAB The Ultimate Hair Repair and Reconditioning Manual, Audrey Davis-Sivasothy, Saja Publishing Company,LLC,  2013

2. The Growth and Structure of Hair, Hair Structure and Chemistry Simplified, 5^th Edition, John Halal, Milady